АGRО ТV: Ўзбекистон фермерлари учун янги телеканал фаолият бошлади

2022 йилнинг 20 декабрь куни Тошкент шаҳридаги Зарафшон мажмуасида ихтисослаштирилган телеканал — «AGRO TV»нинг очилиш маросими бўлиб ўтди.

«Қишлоқ хўжалигига ихтисослашган янги телеканал очилмоқда. Ушбу лойиҳани режалаштиришда Қишлоқ хўжалиги вазирлиги бош-қош бўлди. Телеканалнинг асосий вазифаси аҳолини мамлакатимиз қишлоқ хўжалиги янгиликлари билан яқиндан таништиришдан иборатдир.  Бундан ташқари, фермерлар ва кластерлар соҳа мутахассислари билан танишиш имкониятига эга бўлишади. Телеканал учун энг асосийси, республикамиз қишлоқ хўжалиги ривожига  ҳисса қўшиш ва аҳоли учун сифатли, фойдали кўрсатувлар тайёрлашдир», деди Ўзбекистон Республикаси Қишлоқ хўжалиги вазири ўринбосари Алишер Тўраев.

Қишлоқ хўжалиги вазирлиги матбуот хизматининг хабарига кўра, «AGRO TV» инновацион телеканал, хусусан, агросаноат мажмуаси бўйича тўлиқ ахборот берувчи манба вазифасини ўтайди. Мамлакатда қишлоқ хўжалиги маҳсулотлари етиштиришнинг бугунги ҳолатини ёритиш, ўсимликлар карантини тизимини янги босқичга кўтариш, соҳага илмий инновациялар, халқаро тажриба ва рақамли технологияларни кенг жорий этиш, қишлоқ хўжалиги маҳсулотлари экспорти ҳажми, географиясини янада кенгайтириш, тадбиркорлик субъектлари ва соҳанинг бошқа йўналишларини қўллаб-қувватлаш режалаштирилган.

«Биз ушбу йўналишда ишлайдиган Молдова, Туркия, Беларусь ва АҚШ телеканаллари билан ҳамкорликни йўлга қўйдик.  Мамлакатимиз ва хориж давлатларидаги қишлоқ хўжалиги ташкилотлари билан ҳам алоқадамиз.  Келгусида махсус қўшма лойиҳа тайёрлаш ниятидамиз», дейди «АGRO TV» директори Азиз Набихонов.

Телеканал мақсадли аудиторияни жаҳон ва маҳаллий қишлоқ хўжалигидаги янгиликлардан хабардор қилади, томошабинларни халқаро тажрибалар, инновациялар, етакчи маҳаллий ва хориж экспертларининг фикрлари билан таништиради.