Россияда картошка нархи пасайиши вақтинчалик ҳолатми?

EastFruit лойиҳасининг кундалик мониторингига кўра, Россияда картошка нархи пасая бошлаган. Қайд этиш жоизки, ўтган ҳафтада фермерлар картошка нархини анча юқори даражада ушлаб туришга ҳаракат қилишди. Аммо шу ҳафта бошида белгиланган нарх даражасида узоқ муддат сақлаш мумкин бўлмаган ҳажмларни сотиш совуқ бошланишидан аввал жуда қийин кечиши маълум бўлди.

Шу билан бирга, россиялик картошка етиштирувчилар бу йилги ҳосилга харидор камлигидан шикоят қилишмоқда. Пандемия туфайли ресторан ва кафелардан талаб пасайди ва оддий истеъмолчилар бу сабзавотни камроқ сотиб оладиган бўлишди. Шундай қилиб, бугунги кунда картошкани сотиш нархлари 27-38 рубл/кг (0,38-0,53 доллар/кг) оралиғида шаклланмоқда, бу ўтган иш ҳафтаси охирига нисбатан ўртача 10% арзонроқдир.

Айтиш жоизки, маҳаллий картошка таннархини пасайтиришнинг яна бир омили мамлакат ички бозоридаги импорт маҳсулотларининг анча катта партиялари бўлди. Шундай қилиб, бугунги кунда импорт  картошкасининг асосий етказиб берувчилари Беларусь ва Эрондир. Шу билан бирга, Эрон картошкасининг нархи маҳаллий маҳсулотлар билан бир хил даражада – 35-38 рубл/кг (0,49-0,53 доллар/кг). Беларусь картошкаси эса анча арзонроқ сотувга чиқарилади – 25-27 рубл/кг (0,35-0,38 доллар/кг).

Шунингдек ўқинг: Украина Шарқий Европадаги энг арзон картошкани таклиф қилмоқда!

Бу омиллар босими остида россиялик картошка етиштирувчилар ҳам нархларни тушира бошлашди, чунки, мамлакатда 7 ноябргача карантин чекловлари жорий қилинган ва ушбу маҳсулотларни сотиш суръати пасайган.

Картошка арзонлашишига қарамай, бугунги кунда Россия бозорида бу маҳсулот ўтган йилнинг ноябрь ойи бошига қараганда ўртача 2 баравар қиммат. Шу билан бирга, аксарият бозор  иштирокчилари картошка сегментидаги нархларнинг ҳозирги пасайишини вақтинчалик дея ҳисоблашмоқда, чунки, жорий мавсумда ушбу экиннинг ҳосилдорлиги бироз пасайди.